ಕಾಕಿ ಹಣ್ಣು – ಕಾಕ ಮಾಚಿ – ಕಾಗೆ ಸೊಪ್ಪಿನ ಹಣ್ಣು ಎಂದು ಕರೆಯುವ ಈ ಡಾರ್ಕ್ ನೈಟ್ ಶೇಡ್ ಎಂದು ಇಂಗ್ಲೀಷಿನಲ್ಲಿ ಕರೆಯುವ ಮತ್ತು 61 ದೇಶಗಳಲ್ಲಿ ಕಳೆ ಸಸ್ಯ ಎಂದು ಘೋಷಿಸಿರುವ ಕಾಕಿ ಹಣ್ಣು ಬೇಲಿ ಸಾಲಿನ ಕಪ್ಪು ದ್ರಾಕ್ಷಿಯ ಮಿನಿಯೇಚರನಂತ ಸಿಹಿ ಹುಳಿಯ ಹಣ್ಣು ಮಲೆನಾಡಿನ ಮಕ್ಕಳಿಗೆ ಹೆಚ್ಚು ಪರಿಚಿತ. ತಪ್ಪದೆ ಮುಂದೆ ಓದಿ …
ಗುಲಗುಂಜಿ ಗಾತ್ರದ ಕಪ್ಪು ಹಣ್ಣಿನಲ್ಲಿ 40 ಬೀಜಗಳಿದ್ದರು ಇದು ಅದಾಗಿಯೇ ಮಣ್ಣಿನಲ್ಲಿ ಬಿದ್ದು ಗಿಡವಾಗುವುದಿಲ್ಲ, ಈ ಬೀಜ ಕಾಗೆ ಇನ್ನಿತರ ಪಕ್ಷಿ ಹೊಟ್ಟೆ ಸೇರಿ ಅಲ್ಲಿ ಇದರ ಬೀಜ ಜೀರ್ಣಾಂಗದ ಮೂಲಕ ಹಾದು ಅದು ಮೊಳಕೆ ಒಡೆಯುವ ಹಂತಕ್ಕೆ ಬೇಕಾದ ಉಷ್ಣಾಂಶ ಪಡೆದು ಹಕ್ಕಿಯ ವಿಸರ್ಜನೆ ಮಣ್ಣಿಗೆ ಸೇರಿ ಮುಂಗಾರಿನ ಮಳೆಯ ತೇವಾಂಶ ಪಡೆದು ಚಿಗುರಿ ಗಿಡವಾಗಿ ಅಕ್ಟೋಬರ್ – ನವೆಂಬರ್- ಡಿಸೆಂಬರ್ ತಿಂಗಳಲ್ಲಿ ಹಣ್ಣು ಬಿಡುವ ಸಸ್ಯ ಇದು. ಇದೇ ರೀತಿ ಜೀರಿಗೆ ಮೆಣಸಿನ ಬೀಜ ಪ್ರಸಾರ ಕೂಡ ಆಗುತ್ತದೆ.
ಫೋಟೋ ಕೃಪೆ : google
ತೆಂಗಿನ ಮರ ಎತ್ತರ ಎತ್ತರಕ್ಕೆ ಬೆಳೆದು ಅದರ ಕಾಯಿ ಉದುರಿ ಪುಟಿದು ದೂರ ದೂರಕ್ಕೆ ತಲುಪಿ ಅಮೇರಿಕಾದ ಸಮುದ್ರ ತೀರ ದಾಟಿ ಆಫ್ರಿಕಾ ಖಂಡ ದಾಟಿ ಭಾರತದ ಪಶ್ಚಿಮ ಕರಾವಳಿ ತಲುಪಿದ ಕಥೆಗೆ ವೈಜ್ಞಾನಿಕ ಸಾಕ್ಷಿ – ಸಬೂತುಗಳಿದೆ. ಕಾಗೆಯಿಂದಲೇ ಈ ಕಾಕಿ ಹಣ್ಣು ಬೀಜ ಪ್ರಸಾರ ಆಗುವುದರಿಂದ ಇದಕ್ಕೆ ಕಾಗೆ ಸೊಪ್ಪಿನ ಹಣ್ಣು, ಕಾಕ ಮಾಚಿ ಮತ್ತು ಕಾಕಿ ಹಣ್ಣು ಅಂತ ಹೆಸರು ಬಂತಾ? ಗೊತ್ತಿಲ್ಲ .
ಈ ಗಿಡ ಮತ್ತು ಹಣ್ಣಿನಲ್ಲಿ ವಿಟಮಿನ್ ಸಿ ಮತ್ತು ಬಿ ಯಥೇಚ್ಛವಾಗಿದೆ, ರೋಗ ನಿರೋಧಕ ಶಕ್ತಿ ವಿಪುಲವಾಗಿದೆ, ಶೀಥ – ಕಫ – ಜ್ವರ ಗುಣ ಪಡಿಸುವ ಔಷದಿಯುಕ್ತ ಈ ಸಸ್ಯದ ಎಲೆಯ ತಂಬುಳಿ ಮಲಬದ್ದತೆ ನಿವಾರಣೆ ಮಾಡುತ್ತದೆ. ಕಾಕಿ ಹಣ್ಣಿನ ಎಲೆ ಎಣ್ಣೆಯಲ್ಲಿ ಕುದಿಸಿ ಚರ್ಮದ ಮೇಲೆ ಲೇಪಿಸಿದರೆ ಚರ್ಮ ರೋಗ ನಿವಾರಣೆ ಆಗುತ್ತದೆ. ಜೇನಿನ ಜೊತೆ ಬೆರೆಸಿ ಸೇವಿಸಿದರೆ ರಕ್ತ ಸ್ರಾವ ನಿಯಂತ್ರಣ ಆಗಲಿದೆ.
ಉರಿ ಮೂತ್ರ – ಮೂಲ ವ್ಯಾದಿ ಮತ್ತು ಬಾಯಿ ಹುಣ್ಣು ಗುಣಪಡಿಸಲು ಕಾಕಿ ಹಣ್ಣಿನ ಎಲೆಗಳು ರಾಮ ಬಾಣವಾಗಿ ಭಾರತೀಯ ಆಯುರ್ವೇದದಲ್ಲಿ ಬಳಸುತ್ತಾರೆ. ಅದೃಷ್ಟವಶಾತ್ ನಮ್ಮ ಮನೆಯ ಹೂವಿನ ಕುಂಡದಲ್ಲಿ ಈ ಕಾಕಿ ಗಿಡ ಬೆಳೆದು ಹೂವು ಕಾಯಿ ಆಗಿ ಹಣ್ಣಾಗಿದೆ ಇವತ್ತು ಇದರ ಮೊದಲ ಫಲ ನನ್ನ ಪ್ರೀತಿಯ ಶಂಭೂರಾಮನಿಗೆ ಸಮರ್ಪಿಸಲಾಯಿತು.
- ಅರುಣ್ ಪ್ರಸಾದ್
