ನಾನು …ನಾನು… ಎನ್ನುವರ ಮುಂದೆ ನೀವೇ ದೊಡ್ಡವರೆಂದು ಕೈ ಮುಗಿದು ಮುಂದೆ ಸಾಗುತ್ತೇನೆ !! ನಾನೊಬ್ಬ ಹುಚ್ಚ …ಪ್ರೊ. ಸಿದ್ದು ಸಾವಳಸಂಗ ಅವರ ಭಾವಪೂರ್ವಕ ಕವನವನ್ನು ತಪ್ಪದೆ ಮುಂದೆ ಓದಿ…
ನಾನೊಬ್ಬ ಮಹಾಹುಚ್ಚ…
ಎದುರಿಗೆ ಬಂದವರ ಕೈಕುಲುಕಿ
ಕುಶಲೋಪರಿ ವಿಚಾರಿಸುತ್ತೇನೆ !
ಅವರ ಸಾಧನೆಗಳನ್ನು ಹೊಗಳುತ್ತೇನೆ !
ಅವರು ದೊಡ್ಡವರೇ ಆಗಲಿ
ಸಣ್ಣವರೇ ಆಗಲಿ
ಎಲ್ಲರೊಂದಿಗೆ ಬೆರೆಯುತ್ತೇನೆ !
ಅವರ ಸ್ನೇಹ ಸಂಪಾದಿಸಲು ಬಯಸುತ್ತೇನೆ !
ಅವರ ಮುಖದ ಮಂದಹಾಸ
ನೋಡಿ ನಗೆ ಬೀರುತ್ತೇನೆ !
ಅವರೊಂದಿಗೆ ಮಕ್ಕಳಿದ್ದರೆ
ಅವರನ್ನು ಹುರುದುಂಬಿಸುತ್ತೇನೆ !
ಅವರು ಚೆನ್ನಾಗಿ ಓದಿ ಮುಂದೆ
ಬರಲೆಂದು ಶುಭ ಹಾರೈಸುತ್ತೇನೆ !
ಪರಿವಾರದೊಂದಿಗೆ ಮನೆಗೆ
ಬರಲು ಆಹ್ವಾನ ನೀಡುತ್ತೇನೆ !
ಒಂದು ವೇಳೆ ಯಾರಾದರೂ
ಮನೆಗೆ ಬಂದರೆ ಪ್ರೀತಿ-ಸ್ನೇಹದಿಂದ
ಅವರಿಗೆ ಉಪಹಾರ ಚಹಾ
ನೀಡಿಯೇ ಕಳಿಸುತ್ತೇನೆ !
ಆದರೂ…..
ಕಾಲ ಕೆಟ್ಟು ಹೋಗಿದೆ !
ಜನ ಮುಂದೊಂದು ಹಿಂದೊಂದು ಮಾತನಾಡುತ್ತಾರೆ !
ನಾನು ತೋರುವ ಪ್ರೀತಿ-ಪ್ರೇಮಕ್ಕೆ
ಅವರ ಪ್ರತಿಕ್ರಿಯೆ ನಕಾರಾತ್ಮಕವಾಗಿರುತ್ತದೆ !
ತಾವೇ ಜಗತ್ತನ್ನು ಗೆದ್ದ
ಅಲೆಕ್ಸಾಂಡರ್ ನಂತೆ ವರ್ತಿಸುತ್ತಾರೆ !
ತಮ್ಮ ಬಗ್ಗೆ ಇಲ್ಲಸಲ್ಲದ
ಜಂಭ ಕೊಚ್ಚಿಕೊಳ್ಳುತ್ತಾರೆ !
ತಮ್ಮ ಸಿರಿವಂತಿಕೆಯನ್ನು
ನನ್ನ ಮುಂದೆ ಪ್ರದರ್ಶಿಸುತ್ತಾರೆ !
ಆದರೆ…
ನಾನು ಎಲ್ಲವನ್ನೂ ನೋಡಿ
ಮೌನಕ್ಕೆ ಶರಣಾಗುತ್ತೇನೆ !
ನೀವೇ ದೊಡ್ಡವರೆಂದು ಕೈ ಮುಗಿದು ಬೇಸರದಿಂದ ಮುಂದೆ ಸಾಗುತ್ತೇನೆ !!
- ಪ್ರೊ. ಸಿದ್ದು ಸಾವಳಸಂಗ, ವಿಜಯಪುರ ( ಕಾವ್ಯನಾಮ – ಚಿರಂಜೀವಿ )
