ಎಮ್ಮೆ, ಜಾನುವಾರುಗಳಲ್ಲಿ ಅಪರೂಪಕ್ಕೆ ಕಾಣುವ ಈ ರೀತಿಯ ಬಿಳಿತೊನ್ನು ನೋಡಿರುತ್ತೀರಿ. ಅನೇಕರಲ್ಲಿ ಪ್ರಾಣಿಗಳಲ್ಲಿ ಕಂಡುಬರುವ ಈ ಬಿಳಿತೊನ್ನು ಹಾಲಿನ ಮುಖಾಂತರ ಅಥವಾ ಅದರ ಚರ್ಮವನ್ನು ಸ್ಪರ್ಶಿಸಿದಾಗ ಮನುಷ್ಯರಿಗೂ ಅಂಟುವುದೆಂಬ ತಪ್ಪು ಕಲ್ಪನೆ ಇರುತ್ತದೆ. – ಡಾ ಯುವರಾಜ್ ಹೆಗಡೆ, ಮುಂದೆ ಓದಿ…
ಇದೇ ಕಾರಣಕ್ಕೆ ಬಿಳಿತೊನ್ನು ಸಮಸ್ಯೆ ಇರುವ ಎಮ್ಮೆಗಳಿಗೆ ಗಿರಾಕಿಗಳು ಇಲ್ಲದೆ #ಮಾಲೀಕರು ನಷ್ಟ ಅನುಭವಿಸುತ್ತಾರೆ. ಆದರೆ ವೈಜ್ಞಾನಿಕವಾಗಿ ಅದು ನಿರಾಧಾರವಾಗಿದ್ದು , ಈ ರೀತಿಯ ಬಿಳಿತೊನ್ನು ಮನುಷ್ಯರಿಗೆ ಖಂಡಿತ ದಾಟುವುದಿಲ್ಲ. ನೀವು ಧೈರ್ಯವಾಗಿ ಅಂತಹ ಜಾನುವಾರುಗಳ ಹಾಲನ್ನು ಸೇವಿಸಬಹುದು ಹಾಗೂ ಸಾಕಾಣಿಕೆ ಮಾಡಬಹುದು. ಚರ್ಮದಲ್ಲಿ “ಮೆಲಾನಿನ್” ಪ್ರಮಾಣ ಕಡಿಮೆಯಾಗಿ ಈ ರೀತಿಯ ಬಿಳಿತೊನ್ನು ಕಂಡು ಬರುತ್ತದೆ ಎಂದು ತಿಳಿದಿರುವ ಸಂಗತಿಯಾಗಿದೆ.
ಒಮ್ಮೆ ಪಶು ವೈದ್ಯಕೀಯ ಕಾಲೇಜಿನಲ್ಲಿ ಫಾರ್ಮಕಾಲಜಿ ವಿಭಾಗದಲ್ಲಿ ಪ್ರಾಧ್ಯಾಪಕರಾಗಿರುವ ಡಾ.ಶ್ರೀಧರ್ ಅವರೊಂದಿಗೆ ಈ ಕುರಿತು ಚರ್ಚಿಸಿದಾಗ ಜಾನುವಾರುಗಳಲ್ಲಿ ತೊನ್ನಿನ ಸಮಸ್ಯೆಗೆ ಹಲವಾರು ಕಾರಣಗಳಿದ್ದು , ಹೆಚ್ಚಿನ ಸಂದರ್ಭಗಳಲ್ಲಿ ಎಮ್ಮೆಗಳಿಗೆ ತಾಮ್ರದ ಕೊರತೆಯಿಂದ ತೊನ್ನು ಕಂಡು ಬರುತ್ತದೆ ಎಂದು ಮಾಹಿತಿ ಹಂಚಿಕೊಂಡಿದ್ದರು. ಅದರ ನಿವಾರಣೆಗಾಗಿ ದಿನಕ್ಕೆ 3-5 ಗ್ರಾಂ ನಷ್ಟು( ಅರ್ಧ ಟೀ ಚಮಚ) ತುತ್ತವನ್ನು ನಿಯಮಿತವಾಗಿ 4-6 ವಾರಗಳ ಕಾಲ ನೀಡಿದಲ್ಲಿ ಉತ್ತಮ ಫಲಿತಾಂಶ ನೀಡಬಹುದೆಂಬ ಸಲಹೆಯನ್ನು ನೀಡಿದ್ದರು. ಆದರೆ ತುತ್ತವನ್ನು 5 ಗ್ರಾಂ ಗಿಂತ ಹೆಚ್ಚಿಗೆ ನೀಡಿದರೆ ಅಡ್ಡ ಪರಿಣಾಮ ಉಂಟಾಗಬಹುದು, ಆದ್ದರಿಂದ #ಪಶುವೈದ್ಯರ ಮಾರ್ಗದರ್ಶನದಲ್ಲಿ ಎಚ್ಚರ ವಹಿಸಿ ನೀಡಬೇಕಾದೀತು.
- ಡಾ ಯುವರಾಜ್ ಹೆಗಡೆ (ಪಶುವೈದ್ಯರು,ವೈದಕೀಯ ಬರಹಗಾರರು) ತೀರ್ಥಹಳ್ಳಿ.
