‘ತಲೆಗೆ ಬಿದ್ದ ಏಟು’ ಕೃತಿಯ ಪರಿಚಯ

ಡಾ. ನಾಗರಾಜು ಜಿ. ಬಿ. ಭೈರೇನಹಳ್ಳಿಯವರ ‘ತಲೆಗೆ ಬಿದ್ದ ಏಟು’ ಕಥಾಸಂಕಲನವು ನಮ್ಮ ಸುತ್ತಲಿನ ಸಮಾಜದ ಒಳಹೊಕ್ಕು, ಮನುಷ್ಯ ಸಂಬಂಧಗಳ ಸಂಕೀರ್ಣತೆಗಳು, ಬದುಕಿನ ಏಳುಬೀಳುಗಳು ಮತ್ತು ಅನಿರೀಕ್ಷಿತ ತಿರುವುಗಳನ್ನು ಅತ್ಯಂತ ಸೂಕ್ಷ್ಮವಾಗಿ ಕಟ್ಟಿಕೊಡುವ ಒಂದು ವಿಶಿಷ್ಟ ಕೃತಿಯಾಗಿದೆ. ಈ ಕೃತಿಯ ಕುರಿತು ಶ್ರೀಧರ್ ಡಿ ಸಿ ಅವರು ತಮ್ಮ ಅಭಿಪ್ರಾಯವನ್ನು ಹಂಚಿಕೊಂಡಿದ್ದಾರೆ, ತಪ್ಪದೆ ಮುಂದೆ ಓದಿ…

ಪುಸ್ತಕ : ತಲೆಗೆ ಬಿದ್ದ ಏಟು
ಲೇಖಕರು : ಡಾ. ನಾಗರಾಜು ಜಿ. ಬಿ. ಭೈರೇನಹಳ್ಳಿ
ಪ್ರಕಾಶನ : ಅಮೂಲ್ಯ ಪುಸ್ತಕ Krishna ಚೆಂಗಡಿ
ಬೆಲೆ : 175.00

ಡಾ. ನಾಗರಾಜು ಜಿ. ಬಿ. ಭೈರೇನಹಳ್ಳಿಯವರ ‘ತಲೆಗೆ ಬಿದ್ದ ಏಟು’ ಕಥಾಸಂಕಲನದಲ್ಲಿ ಒಟ್ಟು ಹತ್ತು ಕಥೆಗಳನ್ನು ಒಳಗೊಂಡಿದ್ದೆ. ಈ ಸಂಕಲನವು ಮೊದಲ ಕಥೆಯಾದ ‘ಗಾಂಧೀವಾದಿಯ ಹಳೆಯ ಟ್ರಂಕ್’ ನಿಂದ ಆರಂಭಗೊಂಡು ಕೊನೆಯ ಕಥೆಯಾದ ‘ಪಿತೃಪಕ್ಷ’ ದವರೆಗೆ ಓದುಗನನ್ನು ಒಂದು ಭಾವನಾತ್ಮಕ ಮತ್ತು ಚಿಂತನಶೀಲ ಲೋಕಕ್ಕೆ ಕರೆದೊಯ್ಯುತ್ತದೆ.

ಊರ ಹೆಸರಿನಿಂದ ಉಂಟಾಗುವ ಮುಜುಗರ ಮತ್ತು ಅದನ್ನು ಬದಲಾಯಿಸಲು ನಡೆಯುವ ಹಾಸ್ಯಮಯ ಹಾಗೂ ವಾಸ್ತವಿಕ ಹೋರಾಟದ ಮೂಲಕ ‘ಗಾಂಧೀವಾದಿಯ ಹಳೆಯ ಟ್ರಂಕ್’ ಕಥೆಯು ಓದುಗನ ಮುಖದಲ್ಲಿ ನಗು ಹುಟ್ಟಿಸುತ್ತಲೇ ಗಂಭೀರ ಯೋಚನೆಗೆ ಹಚ್ಚುತ್ತದೆ. ಇನ್ನು ‘ರೂಬಿಕ್ಸ್ ಕ್ಯೂಬ್’ ಕಥೆಯು ಬದುಕಿನ ಒಗಟುಗಳನ್ನು ಬಿಡಿಸುವ ಮಾನವ ಪ್ರಯತ್ನಗಳನ್ನು ಮಾನಸಿಕ ಆಳದಲ್ಲಿ ವಿಶ್ಲೇಷಿಸಿದರೆ, ‘ಕತ್ತಾಳೆ’ ಮತ್ತು ‘ನದಿಯ ಮೂಲ’ ಕಥೆಗಳು ಗ್ರಾಮೀಣ ಬದುಕಿನ ಒರಟುತನ, ಸಂಕಷ್ಟಗಳು ಹಾಗೂ ಅಲ್ಲಿನ ಜನರ ಬವಣೆಗಳನ್ನು ಹಸಿ ಹಸಿಯಾಗಿ ತೆರೆದಿಡುತ್ತವೆ. ‘ತಲೆಗೆ ಬಿದ್ದ ಏಟು’ ಕಥೆಯು ಮನುಷ್ಯನ ಅಹಂಕಾರ ಮತ್ತು ಆಕಸ್ಮಿಕ ಸಂದರ್ಭಗಳು ಬದುಕನ್ನು ಹೇಗೆ ಬದಲಾಯಿಸುತ್ತವೆ ಎಂಬುದನ್ನು ಮಾರ್ಮಿಕವಾಗಿ ನಿರೂಪಿಸುತ್ತದೆ. ‘ನೀನು ಕತೆಯೊಳಗೋ, ಕತೆಯು ನಿನ್ನೊಳಗೋ’ ಹಾಗೂ ‘ಒಂಟಿ ಮಾವಿನ ಮರ’ ಕಥೆಗಳು ವ್ಯಕ್ತಿತ್ವದ ಏಕಾಂಗಿತನ, ನೆನಪುಗಳು ಮತ್ತು ಅಂತರ್ಮುಖಿ ಬದುಕಿನ ಸೂಕ್ಷ್ಮ ಎಳೆಗಳನ್ನು ಸುಂದರವಾಗಿ ಸ್ಪರ್ಶಿಸುತ್ತವೆ. ‘ಗೆದ್ದಲು’ ಕಥೆಯು ಸಂಬಂಧಗಳನ್ನು ಒಳಗಿನಿಂದಲೇ ಕೊರೆಯುವ ಸ್ವಾರ್ಥ ಹಾಗೂ ಅಪನಂಬಿಕೆಗಳನ್ನು ರೂಪಕವಾಗಿ ತೋರಿಸಿದರೆ, ‘ಹುತಾತ್ಮ’ ಕಥೆಯು ಆದರ್ಶ ಹಾಗೂ ರಾಜಕೀಯ ವಾಸ್ತವಗಳ ನಡುವಿನ ಸಂಘರ್ಷವನ್ನು ಎಳೆಎಳೆಯಾಗಿ ಬಿಚ್ಚಿಡುತ್ತದೆ.

ಕೊನೆಯ ಕಥೆಯಾದ ‘ಪಿತೃಪಕ್ಷ’ವು ಇಡೀ ಸಂಕಲನದ ಭಾವನಾತ್ಮಕ ಶಿಖರವೆಂದೇ ಹೇಳಬಹುದು. ತಂದೆಯ ಮೇಲಿನ ಪ್ರೀತಿ, ಹುಡುಕಾಟ, ಅನಿರೀಕ್ಷಿತ ಸತ್ಯಗಳ ಮುಖಾಮುಖಿ ಮತ್ತು ಕ್ಷಮೆಯ ಮಹತ್ವವನ್ನು ಇದು ಅದ್ಭುತವಾಗಿ ಕಟ್ಟಿಕೊಡುತ್ತದೆ. ಕಥೆಯಲ್ಲಿ ಬರುವ ಮುನ್ನಾ ಮತ್ತು ಬಾಲು ಪಾತ್ರಗಳ ಮೂಲಕ ತಂದೆ-ಮಕ್ಕಳ ಸಂಬಂಧದ ಮೌಲ್ಯವನ್ನು ಲೇಖಕರು ಬಹಳ ಪರಿಣಾಮಕಾರಿಯಾಗಿ ತೋರಿಸಿದ್ದಾರೆ.

ಈ ಸಂಪೂರ್ಣ ಸಂಕಲನದುದ್ದಕ್ಕೂ ಲೇಖಕರ ಭಾಷಾಶೈಲಿ ಸರಳ, ನೇರ ಹಾಗೂ ಮನ ಮುಟ್ಟುವಂತಿದೆ. ಪಾತ್ರಗಳ ಸೃಷ್ಟಿ ಮತ್ತು ಅವರ ಸಂಭಾಷಣೆಗಳು ನಮ್ಮದೇ ಊರಿನಲ್ಲಿ ನಡೆಯುತ್ತಿರುವಂತೆ ಸ್ವಾಭಾವಿಕವಾಗಿ ಮೂಡಿಬಂದಿವೆ. ಯಾವುದೇ ಅತಿರೇಕದ ಕಲ್ಪನೆಗಳಿಲ್ಲದೆ, ಬದುಕಿನ ಒರಟು ಸತ್ಯಗಳನ್ನು ಮತ್ತು ಮಾನವ ಮನಸ್ಸಿನ ದೌರ್ಬಲ್ಯಗಳನ್ನು ಮುಚ್ಚುಮರೆಯಿಲ್ಲದೆ ಚಿತ್ರಿಸಿರುವುದು ಈ ಕೃತಿಯ ಶಕ್ತಿಯಾಗಿದೆ. ಕಥೆಗಳು ನೀಡುವ ಸಂದೇಶ ಮತ್ತು ಭಾವನಾತ್ಮಕ ತೀವ್ರತೆಯು ಓದುಗನ ಮನಸ್ಸಿನಲ್ಲಿ ದೀರ್ಘಕಾಲ ಉಳಿಯುತ್ತದೆ.

• ಶ್ರೀಧರ್ ಡಿ ಸಿ