ವಿರುದ್ಧ ದಿಕ್ಕಲಿ ಚಲಿಸಿದರೇನಂತೆ; ನಾನಿಡುವ ಪ್ರತಿ ಹೆಜ್ಜೆಯಲೂ ನೀ ಜೊತೆಯಾಗುವೆ…ಕವಿಯತ್ರಿ ಡಿ.ಶಬ್ರಿನಾ ಮಹಮದ್ ಅಲಿ ಅವರ ಲೇಖನಿಯಲ್ಲಿ ಅರಳಿದ ಸುಂದರ ಕವನವನ್ನು ತಪ್ಪದೆ ಮುಂದೆ ಓದಿ…
ಲೋಕ ರುಜು ಹಾಕುವ
ನಂಟಿನ ಸಂಗಾತಿಗಳಂತೆ
ಹಗಲು ರಾತ್ರಿ ಒಟ್ಟಿಗೆ
ಕಳೆಯಲಾಗದಿರೇನಂತೆ;
ನನ್ನ ಪ್ರತಿ ಉಸಿರಲಿ ನೀನಿರುವೆ!
ವಾಸ್ತವದಲಿ ಇಬ್ಬರ
ಬದುಕಿನ ಪಥಗಳು ವಿರುದ್ಧ ದಿಕ್ಕಲಿ
ಚಲಿಸಿದರೇನಂತೆ;
ನಾನಿಡುವ ಪ್ರತಿ
ಹೆಜ್ಜೆಯಲೂ ನೀ ಜೊತೆಯಾಗುವೆ!
ನಿನ್ನ ದನಿಗೆ ನಾ;ನನ್ನ ದನಿಗೆ ನೀ
ಕಿವಿಯಾಗದಿರೇನಂತೆ;
ನಿನ್ನೆದೆಯೊಳಗಿನ
ಅನುರಾಗದ ಪಿಸುಮಾತನು
ಸದ್ದಿಲ್ಲದೇ ನಾ ಆಲಿಸುತಿರುವೆ!
ತಲೆಯೆತ್ತಿ ನೋಡಿದರೆ,
ಬಾನು ಭುವಿಯ ಅಂತರ ಅಬ್ಬಾ!
ಅನಿಸಿದರೇನಂತೆ ನನ್ನೊಲವೇ;
ದೃಷ್ಟಿ ಬದಲಿಸಿ ದೂರದಿ ನೋಡು,
ಒಂದನೊಂದು ಬಾಚಿತಬ್ಬಿಲ್ಲವೇ!
ಅಳತೆಗೆ ಸಿಗದಷ್ಟು ಅಂತರವಿದ್ದರೂ;
ಆಪ್ತರಂತೆ ಕಾಣುವ ಬಾನು ಭುವಿಯಂತೆ
ನಾವಿಲ್ಲವೇ ನನ್ನೊಲವೇ ನಾವಿಲ್ಲವೇ!
- ಡಿ.ಶಬ್ರಿನಾ ಮಹಮದ್ ಅಲಿ – ಚಳ್ಳಕೆರೆ
