‘ಉತ್ತರ ಕಾಂಡ’ ಕೃತಿ ಪರಿಚಯ

ಲೇಖಕಿ ಭುವನೇಶ್ವರಿ ಆಚಾರ್ಯರ “ಉತ್ತರ ಕಾಂಡ” ಛಂದೋಬದ್ಧವಾಗಿ, ರೂಪಕಗಳೊಂದಿಗೆ ‘ಚೌಪದಿ’ ಪ್ರಕಾರದಲ್ಲಿ ಬರೆದಿದ್ದಾರೆ. ಲೇಖಕಿ ಚೇತನ ಭಾರ್ಗವ ಅವರು ತಮ್ಮ ಅಭಿಪ್ರಾಯವನ್ನು ಹಂಚಿಕೊಂಡಿದ್ದಾರೆ, ತಪ್ಪದೆ ಮುಂದೆ ಓದಿ…

ಪುಸ್ತಕ: ಉತ್ತರ ಕಾಂಡ
ಲೇಖಕರು: ಭುವನೇಶ್ವರಿ ಆಚಾರ್ಯ
ಪ್ರಕಾಶಕರು: ಹೆಚ್ ಎಸ್ ಆರ್ ಎ ಪ್ರಕಾಶನ
ಪುಟಗಳು: 158+4
ಬೆಲೆ: ರೂ.250
ಮುದ್ರಣ: 2025

ಭುವನೇಶ್ವರಿ ಆಚಾರ್ಯರ “ಉತ್ತರ ಕಾಂಡ” – ಒಂದು ರಸಧಾರೆ ರಾಮಾಯಣದ ಕಥಾಮೃತವು ಮರ್ಯಾದಾ ಪುರುಷೋತ್ತಮ ಶ್ರೀರಾಮನ ಪಟ್ಟಾಭಿಷೇಕದೊಂದಿಗೆ ಮುಗಿಯುವುದಿಲ್ಲ. ಅದರ ನಿಜವಾದ ಪೂರ್ಣತೆ ಮತ್ತು ಭಾವತೀವ್ರತೆ ಇರುವುದೇ ‘ಉತ್ತರ ಕಾಂಡ’ದಲ್ಲಿ. ರಾವಣ ವಧೆಯ ನಂತರದ ಸೀತಾಮಾತೆಯ ಮೇಲಿನ ಅಪವಾದ, ರಾಮನಿಂದ ಸೀತೆಯ ತ್ಯಾಗ, ಲವ-ಕುಶರ ಜನನ, ಅಶ್ವಮೇಧ ಪರ್ವ, ಸೀತೆಯ ಭೂಗರ್ಭಗಮನ ಹಾಗೂ ರಾಮ ನಿರ್ಯಾಣದಂತಹ ಅತ್ಯಂತ ಗಹನವಾದ ಪ್ರಸಂಗಗಳನ್ನು ಇದು ಒಳಗೊಂಡಿದೆ. ರಾಮನ ಧರ್ಮ ಜಿಜ್ಞಾಸೆ ಮತ್ತು ಸೀತೆಯ ಅಸದೃಶ ತ್ಯಾಗ, ಅಪಾರ ಸಹನೆಗಳಿಗೆ ಈ ಕಾಂಡ ಸಾಕ್ಷಿಯಾಗಿದೆ.

ಛಂದೋಬದ್ಧ ಕಾವ್ಯದ ಸಾಹಸ
ಇಂತಹ ಗಹನವಾದ ವಿಚಾರಗಳನ್ನು ಇಂದಿನ ಆಧುನಿಕ ಪೀಳಿಗೆಯಲ್ಲಿ, ಛಂದೋಬದ್ಧವಾಗಿ, ರೂಪಕಗಳೊಂದಿಗೆ ‘ಚೌಪದಿ’ (ನಾಲ್ಕು ಸಾಲುಗಳ ಪದ್ಯ) ಪ್ರಕಾರದಲ್ಲಿ ಬರೆಯುವುದು ನಿಜಕ್ಕೂ ಒಂದು ದೊಡ್ಡ ಸಾಹಸ. ಈ ಸಾಹಸದ ಸಂಪೂರ್ಣ ಶ್ರೇಯಸ್ಸು ಕವಯಿತ್ರಿ ಭುವನೇಶ್ವರಿ ಆಚಾರ್ಯ ಅವರಿಗೆ ಸಲ್ಲಬೇಕು. ಗೌರಿಸುತನ ಪ್ರಾರ್ಥನೆಯೊಂದಿಗೆ ಆರಂಭವಾಗುವ ಈ ಕಾವ್ಯ ಕಥನವು, ಸೀತೆಯ ಅಪವಾದದ ಘಟ್ಟಗಳನ್ನು ಹಾದು ಕೊನೆಗೆ ರಾಮ ನಿರ್ಯಾಣದ ಮಂಗಳದೊಂದಿಗೆ ಸಂಪೂರ್ಣಗೊಳ್ಳುತ್ತದೆ. ಅಚ್ಚುಕಟ್ಟಾದ ಪದಗಳ ಜೋಡಣೆ ಮತ್ತು ಚೌಪದಿಯ ನಿರೂಪಣೆ ಓದುಗರಿಗೆ ಒಂದು ಅಭೂತಪೂರ್ವ ಅನುಭವವನ್ನು ನೀಡುತ್ತದೆ. ಉತ್ತರಕಾಂಡದಂತಹ ಮನೋಜ್ಞ ಕಥಾ ಪ್ರಸಂಗವನ್ನು ಕಾವ್ಯದ ರಸಧಾರೆಯಾಗಿ ಕಟ್ಟಿಕೊಡುವುದು ಸಾಮಾನ್ಯರಿಗೆ ಒಲಿಯದ ವಿದ್ಯೆ; ಆದರೆ ಈ ಕಾವ್ಯ ಪಾಂಡಿತ್ಯ ಭುವನೇಶ್ವರಿ ಆಚಾರ್ಯ ಅವರಿಗೆ ಸಿದ್ಧಿಸಿದೆ.

ಭಾವತೀವ್ರತೆಯ ಚೌಪದಿಗಳು ಸೀತೆಯ ಮೇಲಿನ ಅಪವಾದವನ್ನು ಹಾಗೂ ಅಂದಿನ ಸಮಾಜದ ಕಟು ನುಡಿಗಳನ್ನು ಹೇಳುವ ಈ ಕೆಳಗಿನ ಸಾಲುಗಳ ರಚನೆ ನೇರವಾಗಿ ಓದುಗರ ಮನ ತಟ್ಟುತ್ತದೆ:

ಲಂಕೆಯಲಿ ಬಹುಕಾಲ ಸೆರೆಯಲ್ಲಿದ್ದರು ಸೀತೆ
ರಾವಣನ ವಶವರ್ತಿ ಅವಳಲ್ಲವೇ
ಅವಳನ್ನು ಕರೆತಂದು ವಿಹರಿಸಿಹ ಶ್ರೀ ರಾಮ
ಅವಳೊಡನೆ ಸಲ್ಲಾಪ ಗುಣಧರ್ಮವೇ ||

ಅದೇ ರೀತಿ, ವಾಲ್ಮೀಕಿ ಆಶ್ರಮದಲ್ಲಿ ಬೆಳೆಯುತ್ತಿರುವ ಲವ-ಕುಶರು ಜಾನಕಿಯ ತನಯರು, ಅಂದರೆ ತನ್ನದೇ ಮಕ್ಕಳು ಎಂದು ರಾಮನಿಗೆ ಅರಿವಾದಾಗ, ಆತನ ಮನಸ್ಸಿನಲ್ಲಿ ಮೂಡುವ ತುಮುಲ ಮತ್ತು ಭಾವ ತರಂಗಗಳನ್ನು ಕವಯಿತ್ರಿ ಅತ್ಯಂತ ಮಾರ್ಮಿಕವಾಗಿ ಕಟ್ಟಿಕೊಟ್ಟಿದ್ದಾರೆ:

ರಾಮಚರಿತಾಸ್ಫುರಣ ಗಾನ ದಿನವಹಿ ಕೇಳಿ
ಕುಶಲವರು ಜಾನಕಿಯ ತನಯರೆಂದು
ವಾಲ್ಮೀಕಿ ಆಶ್ರಯದಿ ಬೆಳಗುತಿಹರೆಂದರಿತು
ಶುಧ್ಯಾತ್ಮ ಚರಿತಳನು ನೆನೆದ ರಾಮ
ಕಬ್ಬಿನ ಜಲ್ಲೆಯಂತಹ ರಸಾಸ್ವಾದ

ಈ ಕಾವ್ಯ ಕಥನವು ಅಕ್ಷರಶಃ ಒಂದು ‘ಕಬ್ಬಿನ ಜಲ್ಲೆ’ಯಿದ್ದಂತೆ. ಕಬ್ಬನ್ನು ಹೇಗೆ ನಿಧಾನವಾಗಿ ಜಗಿದು, ಅರೆದು ತಿಂದರೇನೆ ಅದರ ಸಂಪೂರ್ಣ ಸಿಹಿ ಒಲಿಯುತ್ತದೆಯೋ, ಹಾಗೆಯೇ ಈ ಕೃತಿಯನ್ನೂ ಸವಿಯಬೇಕು. ಕವನಗಳ ಕೆಳಗೆ ಸರಳವಾದ ಭಾವಾರ್ಥವಿದ್ದರೂ, ಪ್ರತೀ ಚೌಪದಿಯನ್ನು ನಿಧಾನವಾಗಿ ಓದುತ್ತಾ, ಮನಸ್ಸಿನಲ್ಲಿ ಮಥಿಸಿದರೆ ಮಾತ್ರ ಈ ಕಾವ್ಯ ಕಥಾನಕದ ನಿಜವಾದ ರಸಾಸ್ವಾದ ದಕ್ಕಲು ಸಾಧ್ಯ.

ಮುಕ್ತಾಯ

ರಾಮಾಯಣದ ರಸಧಾರೆ ಆಚಂದ್ರಾರ್ಕವಾಗಿ ಹರಿಯುವಂಥದ್ದು. ಇದು ಹಲವು ಬಗೆಯ ಕಾವ್ಯ ಧಾರೆಗಳಲ್ಲಿ ನಿರಂತರವಾಗಿ ಪ್ರವಹಿಸುತ್ತಲೇ ಬಂದಿದೆ. ಆ ಭಕ್ತಿ ಮತ್ತು ಸಾಹಿತ್ಯದ ಮಹಾ ಪ್ರವಾಹದ ಒಂದು ಸುಂದರ ಝರಿಯಾಗಿ ಭುವನೇಶ್ವರಿ ಆಚಾರ್ಯ ಅವರ ‘ಉತ್ತರ ಕಾಂಡ’ ಕಾವ್ಯ ಕಥನವು ಧಾರೆಯಾಗಿ ನಮ್ಮನ್ನು ಆವರಿಸಿದೆ ಎಂದರೆ ಖಂಡಿತ ಅತಿಶಯೋಕ್ತಿಯಲ್ಲ. ಈ ವಿಶಿಷ್ಟ ಕೃತಿಯು ಎಲ್ಲರ ಕೈ ಸೇರಲಿ. ಈ ಹೊತ್ತಗೆಯು ಓದುಗರೆಲ್ಲರ ಮನವನ್ನೂ, ಮಸ್ತಿಷ್ಕವನ್ನೂ ಬೆಳಗಲಿ. ಶ್ರೀ ರಾಮಚಂದ್ರನ ಕೃಪೆ ಎಲ್ಲರ ಹೃನ್ಮನಗಳನ್ನು ತಣಿಸಲಿ.
ಜೈ ಶ್ರೀ ರಾಮ್.

•  ಚೇತನ ಭಾರ್ಗವ – ಅರಮನೆ ತೋಟ