ಪ್ರೊ. ರೂಪೇಶ್ ಅವರ ಜನ್ಮದಿನದಂದು ಹುಟ್ಟಿದ ಈ ಕವಿತೆಯಲ್ಲಿದೆ ಪ್ರಶ್ನೆಗಳ ಸಾಲುಗಳು, ಜೀವನದ ಸಾರಗಳು. ಮುಂದೆ ಓದಿ…
ಯಾರನ್ನು ನಾ ವಂದಿಸಲಿ
ಧನ್ಯತೆ ಯಾರಿಗೆ ನಾ ಸಮರ್ಪಿಸಲಿ?
ಪರಿಸರವೆಂಬ ಈ ಭೂಮಿಯ
ನೈಸರ್ಗಿಕ ಪೀಳಿಗೆ ಎಂಬ
ಮುಂದುವರಿಯುವ ಮಾಯೆಗೋ?
ಆ ಪೀಳಿಗೆಯಲ್ಲಿ ಪ್ರವಹಿಸುವ
ಹಲವು ಪ್ರಯಾಣಿಕರಲ್ಲಿ ಒಬ್ಬನಾಗುವ
ಈ ಸವಾರಿಗೋ?
ವರುಷ ಕಳೆದಂತೆ ಯೋಚನೆಗಳೆಂಬ
ತುಕ್ಕು ಹಿಡಿದ ಬಲೆಗಳಲ್ಲಿ
ಸಿಕ್ಕಿಕೊಳ್ಳುತ್ತಿರುವ ಚಿಂತನೆಗಳಿಗೋ?
ಭೂಮಿಯಲ್ಲಿ ಜನಿಸುವ
ಕಾರಣವಾದ ನಿಯೋಗವೆಂಬ
ನಿಮಿತ್ತಗಳಿಗೋ ?
ಅದಕ್ಕೆ ಅರ್ಧ ಭಾಗಿಯಾದ
ತಾಯಿಗೊ ಅದರರ್ಧ
ಭಾಗಿಯಾದ ಪಿತನಿಗೋ ?
ಮತ್ತೂ ನನ್ನ ಮಾಂಸ ಜೀವದಿಂದ
ಒಂಬತ್ತು ತಿಂಗಳು ಹೊತ್ತು ರೂಪು ರೇಷೆ ಕೊಟ್ಟು
ಸೃಷ್ಟಿಸಿದ ಆ ಗರ್ಭಪಾತ್ರೆಗೋ?
ಕೂಗಿ ಕರೆದು ಕೊಂಡು ಭುವಿಯಲ್ಲಿ
ಮೊದ ಮೊದಲು ನಾ ಹುಟ್ಟಿ ಬಂದ
ಆ ಕ್ಷಣವೆಂಬ ಶುಭಮುಹೂರ್ತಕ್ಕೋ?
ರಕ್ತಭಂದವನ್ನು ಮುರಿದು
ಅವ್ವನಿಂದ ಅನ್ಯಾನಾಗಿರಲು
ಬೇರ್ಪಟ್ಟ ಆ ಹೊಕ್ಕುಳ ಕುಡಿಗೋ?
ಅವ್ವನೊಂದಿಗಿನ ಹೊಕ್ಕುಳ
ಕುಡಿಯನ್ನು ಕಡಿದು
ಬಿಸಾಕಿದ ಆ ಗಳಿಗೆಗೋ?
ತೆವಳಿಕೊಂಡು ನೆಲ ಮುದ್ದಿಸುತ್ತಾ,
ಮಣ್ಣನ್ನು ನೆಕ್ಕಿತಿಂದು , ಅಂಬೆಗಾಲಿಕ್ಕಲು
ನಿಂತು ಬಿದ್ದ ಆ ಕ್ಷಣಗಳಿಗೋ…..
ತೊದಲು ಮಾತಿನಿಂದ ನಾ
ಅಪ್ಪ ಅಮ್ಮ ನಿಗೆ ಕೊಟ್ಟ
ಆ ಮುತ್ತಿನ ಕ್ಷಣಗಳಿಗೋ?
ಹಿರಿಯರೂ-ಗುರುಗಳು ನನ್ನಲ್ಲಿ ಕಂಡ
ಕಾಣಬಯಸಿದನ್ನು ಅರಿಯದೆ
ಎಲ್ಲೆಲ್ಲೋ ಕೈಜಾರಿಕೊಂಡ ಕ್ಷಣಗಳಿಗೋ?
ಬಾಲ್ಯ,ಹುಡುಗಾಟ, ಯೌವ್ವನದ ಸಮಾರಂಭದಲ್ಲಿ
ಕಳೆದುಕೊಂಡ ಅಮೂಲ್ಯ ಆಯುಷ್ಯದ
ಚೆಲ್ಲಿ ಹೋದ ಸಮಯಾ-ಹರ್ಷವೃಂದಕ್ಕೋ?
ಕುಟುಂಬವನ್ನೂ ಅರಿಯದೆ,
ಮುಂಗೋಪವನ್ನು ತೊಟ್ಟು,
ವ್ಯಯಿಸುತ್ತಿರುವ ವಯಸ್ಸಿಗೋ?
ಅನಕ್ಷರಸ್ಥೆಯ ಶ್ರೀಮಂತಿಕೆಯಿಂದ ನಿತ್ಯವೂ ಗೀಚಿದ
ನೀಚನಾದ ನನ್ನ ವಾಕ್ಯವನ್ನು ಮುಗ್ದರಾಗಿ ಅಭಿನಂದಿಸುವ ನಿಮ್ಮನ್ನೋ?
ಇನ್ನೊಂದು ಜನ್ಮ ವಿಲ್ಲವೆಂದರಿತರೂ
ಇದೆಯೆಂದು ಬೀಗುವ ಅಹಂಕಾರದ
ನನ್ನ ಈ ಸೋಮಾರಿತನಕ್ಕೋ?
ಸಮಾಜದ ಕೆಟ್ಟತನಗಳ
ನೋವುಗಳನ್ನ ನೋಡಿ
ಅಸಹಾಯಕನಾಗಿರುವ ಕ್ರೂರತನಕ್ಕೋ?
ನನ್ನ ಹಳೆಯ ಕ್ಯಾಸಿಟಿನಲ್ಲಿ
ತಿರುಗಿದ ತಿರುಗಲಿರುವ
ರೀಲುಗಳಿಗೋ?
ಯಾರನ್ನು ನಾ ವಂದಿಸಲಿ
ಧನ್ಯತೆ ಯಾರಿಗೆ ನಾ ಸಮರ್ಪಿಸಲಿ?
ನಿಮ್ಮವ ನಲ್ಲ
ರೂಪು
- ಪ್ರೊ.ರೂಪೇಶ್ (ರಾಸಾಯನ ಶಾಸ್ತ್ರ ವಿಭಾಗ, ಉಪನ್ಯಾಸಕರು ವಿಜಯಾ ಕಾಲೇಜು ಬೆಂಗಳೂರು)