ಆರ್ಚರ್ ಮೀನು: ನೀರಿನ ಬಾಣ ಬಿಟ್ಟು ಬೇಟೆಯಾಡುವ ಗುರಿಕಾರ

ಒಂದು ಮೀನು ನೀರಿನೊಳಗೆ ಶಾಂತವಾಗಿ ತೇಲುತ್ತದೆ. ಅದರ ಬೇಟೆ ನೀರಿನಲ್ಲಿಲ್ಲ. ನೀರಿನ ಮೇಲಿರುವ ಎಲೆಯ ಮೇಲೆ ಕುಳಿತಿರುವ ಸಣ್ಣ ಕೀಟವೇ ಅದರ ಗುರಿ. ಕೆಲವೇ ಕ್ಷಣಗಳಲ್ಲಿ ಅದು ಬಾಯಿಯಿಂದ ನೀರಿನ ಸಣ್ಣ ಹೊಡೆತವನ್ನು ಗುರಿಯತ್ತ ಹಾರಿಸುತ್ತದೆ. ಆ ಹೊಡೆತ ಕೀಟಕ್ಕೆ ತಾಗಿ, ಅದು ನೀರಿಗೆ ಬೀಳುತ್ತದೆ. ತಕ್ಷಣ ಮೀನು ಅದನ್ನು ಹಿಡಿದು ತಿನ್ನುತ್ತದೆ. ನೀರನ್ನೇ ಆಯುಧವನ್ನಾಗಿ ಮಾಡಿಕೊಂಡು ಬೇಟೆಯಾಡುವ ಈ ವಿಶಿಷ್ಟ ಮೀನೇ ಆರ್ಚರ್ ಮೀನು. ಪಶುವೈದ್ಯರಾದ ಡಾ. ಎನ್.ಬಿ.ಶ್ರೀಧರ ಅವರು ಆರ್ಚರ್ ಮೀನಿನ ಕುರಿತು ಬರೆದ ಈ ಲೇಖನವನ್ನು ತಪ್ಪದೆ ಮುಂದೆ ಓದಿ…

ಗಾಳಿಯಲ್ಲಿರುವ ಕೀಟಗಳನ್ನು ನೀರಿನ ರಭಸದ ಜೇಟ್‌ನಿಂದ ಕೆಳಗೆ ಬೀಳಿಸುವುದು ಆರ್ಚರ್ ಮೀನಿನ ಪ್ರಸಿದ್ಧ ಬೇಟೆ ತಂತ್ರವಾಗಿದೆ.

ಫೋಟೋ ಕೃಪೆ : ಅಂತರ್ಜಾಲ

ಏನಿದು ಆರ್ಚರ್ ಮೀನು?

ಆರ್ಚರ್ ಮೀನುಗಳು ಟಾಕ್ಸೊಟಿಡೆ ಕುಟುಂಬಕ್ಕೆ ಸೇರಿದ ಮೀನುಗಳು. ಅವುಗಳಲ್ಲಿ ಹೆಚ್ಚು ಪ್ರಸಿದ್ಧವಾದುದು ಬ್ಯಾಂಡೆಡ್ ಆರ್ಚರ್ ಮೀನು (ಟಾಕ್ಸೊಟೆಸ್ ಜಾಕ್ಯುಲಾಟ್ರಿಕ್ಸ್). ಇವು ಮುಖ್ಯವಾಗಿ ಇಂಡೋ-ಪೆಸಿಫಿಕ್ ಪ್ರದೇಶ, ನದಿ ಮುಖಭಾಗಗಳು, ಉಪ್ಪುನೀರು-ತಾಜಾ ನೀರಿನ ಮಿಶ್ರ ಪ್ರದೇಶಗಳು ಮತ್ತು ಕೆಲವೊಮ್ಮೆ ತಾಜಾ ನೀರಿನ ಹರಿವುಗಳಲ್ಲಿ ಕಂಡುಬರುತ್ತವೆ. ಇವು ಸಾಮಾನ್ಯವಾಗಿ ನೀರಿನ ಮೇಲ್ಮೈ ಸಮೀಪ ತೇಲುತ್ತಾ, ಮೇಲಿನ ಕೊಂಬೆ-ಎಲೆಗಳ ಮೇಲೆ ಕುಳಿತಿರುವ ಕೀಟಗಳನ್ನು ಗಮನಿಸುತ್ತವೆ. ಬ್ಯಾಂಡೆಡ್ ಆರ್ಚರ್ ಮೀನುಗಳ ದೇಹದಲ್ಲಿ ಕಂಡುಬರುವ ಕಪ್ಪು ಪಟ್ಟೆಗಳು ಅವುಗಳನ್ನು ಸುಲಭವಾಗಿ ಗುರುತಿಸಲು ಸಹಾಯ ಮಾಡುತ್ತವೆ.

ನೀರಿನೊಳಗಿನ ಬಿಲ್ಲುಗಾರ

ಆರ್ಚರ್ ಮೀನಿನ ವಿಶೇಷತೆ ಎಂದರೆ, ಅದು ಬೇಟೆಯನ್ನು ಬೆನ್ನಟ್ಟುವುದಿಲ್ಲ.ಯಾವುದೇ ಇತರ ಮೀನುಗಳು ನೀರಿನಲ್ಲಿನ ಕೀಟಗಳನ್ನು ತಿನ್ನುತ್ತವೆಯೇ ವಿನಃ ನೀರಿನ ಮೇಲ್ಬಾಗದಲ್ಲಿ ಗಿಡದ ಮೇಲೆ ಕುಳಿತಿರುವ ಕೀಟಗಳನ್ನು ಮುಟ್ಟುವ ಸಹವಾಸಕ್ಕೆ ಹೋಗುವುದಿಲ್ಲ. ಆದರೆ ಆರ್ಚರ್ ಮೀನು ಮಾತ್ರ ಬೇಟೆ ನೀರಿನ ಮೇಲಿದ್ದರೂ, ಅದನ್ನು ಕೆಳಗೆ ಬೀಳಿಸುವ ವ್ಯವಸ್ಥೆಯನ್ನು ಬಳಸುತ್ತದೆ. ಕೀಟ, ಜೇಡ ಅಥವಾ ಇತರೆ ಸಣ್ಣ ಜೀವಿಗಳು ನೀರಿನ ಮೇಲಿರುವ ಎಲೆ ಅಥವಾ ಕೊಂಬೆಗಳ ಮೇಲೆ ಕುಳಿತಾಗ, ಆರ್ಚರ್ ಮೀನು ಸರಿಯಾದ ಸ್ಥಾನಕ್ಕೆ ಬಂದು ನೀರಿನ ಹೊಡೆತ ಹಾರಿಸುತ್ತದೆ. ಈ ತಂತ್ರವು ಕೇವಲ ಕುತೂಹಲಕಾರಿ ವರ್ತನೆಯಷ್ಟೆ ಅಲ್ಲ ಬದಲಾಗಿ ಅದು ಪರಿಸರಕ್ಕೆ ಹೊಂದಿಕೊಂಡಿರುವ ಒಂದು ಪರಿಣಾಮಕಾರಿ ಆಹಾರ ಸಂಪಾದನಾ ವಿಧಾನವಾಗಿದೆ.

ನೀರಿನ ಬಾಣ ಹೇಗೆ ರೂಪುಗೊಳ್ಳುತ್ತದೆ?

ಆರ್ಚರ್ ಮೀನು ಬಾಯಿಯಿಂದ ಹೊರಹೊಮ್ಮುವ ನೀರಿನ ಹೊಡೆತವು ಸಾಮಾನ್ಯ ನೀರಿನ ಉಗುಳುವಿಕೆಯಂತಿಲ್ಲ. ಅದರ ಬಾಯಿ ಮತ್ತು ನಾಲಿಗೆಯ ವಿನ್ಯಾಸ, ಹಾಗೂ ಬಾಯಿಯ ಮೇಲ್ಭಾಗದಲ್ಲಿನ ಸಣ್ಣ ಕಾಲುವೆಯಂತಹ ರಚನೆ ಸೇರಿ ಒಂದು “ಬ್ಲೋ ಟ್ಯೂಬ್” ಅಥವಾ “ವಾಟರ್ ಪಿಸ್ಟಲ್” ರೀತಿಯ ವ್ಯವಸ್ಥೆಯನ್ನು ರೂಪಿಸುತ್ತವೆ. ಮೀನು ನಾಲಿಗೆಯನ್ನು ಬಾಯಿಯ ಮೇಲ್ಭಾಗದ ಕಾಲುವೆಯ ವಿರುದ್ಧ ಒತ್ತಿ, ಹೊರಹಾಕುವ ನೀರನ್ನು ಕೇಂದ್ರೀಕರಿಸುತ್ತದೆ. ಹೀಗಾಗಿ ನೀರಿನ ಸಣ್ಣ ಆದರೆ ಬಲವಾದ ಜೇಟ್ ನಿರ್ಮಾಣವಾಗುತ್ತದೆ. ಕೆಲವು ವಿವರಣೆಗಳ ಪ್ರಕಾರ, ಇವು ತಮ್ಮ ದೇಹದ ಉದ್ದಕ್ಕಿಂತ ಹಲವೆಷ್ಟು ದೂರದಲ್ಲಿರುವ ಗುರಿಯನ್ನೂ ನಿಖರವಾಗಿ ಹೊಡೆಯಬಲ್ಲವು.

ಭೌತಶಾಸ್ತ್ರ ಬಳಸುವ ಬೇಟೆಗಾರ

ಆರ್ಚರ್ ಮೀನಿನ ಬೇಟೆ ವಿಧಾನವು ಜೀವಶಾಸ್ತ್ರದ ಜೊತೆಗೆ ಭೌತಶಾಸ್ತ್ರದ ಉದಾಹರಣೆಯೂ ಆಗಿದೆ. ನೀರಿನ ಜೇಟ್ ಹೊರಬಂದ ನಂತರ ಅದು ತುಂಡಾಗಿ ಹೋದರೂ, ಜೆಟ್ ನ ಹಿಂಭಾಗದ ನೀರು ಮುಂಭಾಗಕ್ಕಿಂತ ವೇಗವಾಗಿ ಚಲಿಸಿ ಮುಂದೆ ಸೇರಿಕೊಳ್ಳುವುದರಿಂದ ಗುರಿಗೆ ತಗುಲುವ ಹೊಡೆತದ ಬಲ ಹೆಚ್ಚುತ್ತದೆ ಎಂದು ಅಧ್ಯಯನಗಳು ತೋರಿಸಿವೆ. ಅಂದರೆ, ಕೀಟವನ್ನು ಕೆಳಗೆ ಬೀಳಿಸಲು ಬೇಕಾದ ಶಕ್ತಿಯನ್ನು ಈ ಮೀನು ಸರಳ ನೀರಿನ ಹೊಡೆತದಲ್ಲೇ ಕೇಂದ್ರೀಕರಿಸುತ್ತದೆ. ಹೀಗಾಗಿ ಇದು ಕೇವಲ “ನೀರನ್ನು ಉಗುಳುವ ಮೀನು” ಅಲ್ಲ; ನೀರಿನ ಹರಿವಿನ ಗುಣಗಳನ್ನು ಪರಿಣಾಮಕಾರಿಯಾಗಿ ಬಳಸುವ ಬೇಟೆಗಾರ ಎಂದು ಹೇಳಬಹುದು.

ಫೋಟೋ ಕೃಪೆ : ಅಂತರ್ಜಾಲ

ಗುರಿ ಹಿಡಿಯುವ ಕಣ್ಣಿನ ವಿಜ್ಞಾನ

ಮಹಾಭಾರತದಲ್ಲಿ ಅರ್ಜುನ ಎಣ್ಣೆಯ ಕೊಪ್ಪರಿಗೆಯಲ್ಲಿ ತಿರುಗುತ್ತಿರುವ ಮೀನಿನ ನೆರಳನ್ನು ಗುರಿಯಿಟ್ಟು ಹೊಡೆದು ದ್ರೌಪದಿಯನ್ನು ಪಡೆದ ಕಥನವಿದೆ. ಈ ಅರ್ಚರ್ ಮೀನು ಅರ್ಜುನನನ್ನು ದಿನವೂ ಮೀರಿಸುತ್ತಿರುತ್ತದೆ. ಆರ್ಚರ್ ಮೀನಿನ ಬೇಟೆಯಲ್ಲಿ ಅತ್ಯಂತ ಕುತೂಹಲಕಾರಿ ಸಮಸ್ಯೆ ಎಂದರೆ ಬೆಳಕಿನ ವಕ್ರೀಭವನ ಪರಿಣಾಮವನ್ನು ಮೀರಿ ನಿಲ್ಲುವುದು. ಈ ಮೀನಿನ ಕಣ್ಣುಗಳು ನೀರಿನೊಳಗಿದ್ದು ಅದರ ಬೇಟೆಯು ನೀರಿನ ಮೇಲ್ಬಾಗದ ಯಾವುದೋ ಎಲೆಯ ಮೇಲೆ ಇರುತ್ತದೆ. ನೀರು ಮತ್ತು ಗಾಳಿಯ ನಡುವಿನ ಗಡಿಯಿಂದ ಬೆಳಕು ವಕ್ರೀಭವನದ ಪರಿಣಾಮದಿಂದ ಬಾಗುತ್ತದೆ. ಹೀಗಾಗಿ ಗುರಿಯ ನಿಜವಾದ ಸ್ಥಾನ ಮತ್ತು ಕಣ್ಣಿಗೆ ಕಾಣುವ ಸ್ಥಾನ ಒಂದೇ ಆಗುವುದಿಲ್ಲ. ಆದರೂ ಆರ್ಚರ್ ಮೀನುಗಳು ಬೇಟೆಯನ್ನು ನಿಖರವಾಗಿ ಹೊಡೆಯುತ್ತವೆ. ಈ “ವಕ್ರೀಭವನ ಸಮಸ್ಯೆ”ಯನ್ನು ಆರ್ಚರ್ ಮೀನುಗಳು ಹೇಗೆ ಸಮರ್ಥವಾಗಿ ನಿರ್ವಹಿಸುತ್ತವೆ ಎಂಬುದು ಬಹುಕಾಲದಿಂದ ವಿಜ್ಞಾನಿಗಳಿಗೆ ಆಸಕ್ತಿಯ ವಿಷಯವಾಗಿದೆ. ಈ ಕುರಿತು ಅಧ್ಯಯನವು 1977 ರಲ್ಲಿ ಪ್ರಾರಂಭವಾದರೂ ಸಹ ಇನ್ನೂ ಅಚ್ಚರಿಯಾಗಿಯೇ ಉಳಿದಿದೆ.

ಕಣ್ಣಿನ ತೀಕ್ಷ್ಣತೆ ಮತ್ತು ಬೇಟೆಯ ನಿಖರತೆ

ಆರ್ಚರ್ ಮೀನುಗಳ ದೃಷ್ಟಿ ಸಾಮರ್ಥ್ಯವೂ ಗಮನಾರ್ಹವಾಗಿದೆ. ಅವುಗಳ ಕಣ್ಣುಗಳು ಮೇಲ್ಮೈ ಸಮೀಪದ ಗುರಿಯನ್ನು ವಿಶಿಷ್ಟವಾಗಿ ಗಮನಿಸಲು ಹೊಂದಿಕೊಂಡಿವೆ. ಇದರ ಗುರಿ ಅದೆಷ್ಟು ಕರಾರುವಾಕ್ಕು ಎಂದರೆ ಇದು ಕೀಟವನ್ನು ಅದರ ರೂಪ ಮತ್ತು ಸ್ಥಾನವನ್ನು ಗುರುತಿಸಿ ಕರಾವಾಕ್ಕಾಗಿ ಗುರಿ ಇಟ್ಟು ನೀರಿನ ಜೆಟ್ ಮೂಲಕ ಕೆಳಗೆ ಬೀಳಿಸಿ ಅಷ್ಟೇ ವೇಗದಿಂದ ಇತರ ಮೀನುಗಳು ಕೀಟವನ್ನು ತಿನ್ನುವುದರೊಳಗೆ ಅದರ ಮೇಲೆ ದಾಳಿಯಿಟ್ಟಾಗಿರುತ್ತದೆ. ಹೀಗಾಗಿ ಆರ್ಚರ್ ಮೀನಿನ ಬೇಟೆ ಯಶಸ್ಸು ಕೇವಲ ನೀರಿನ ಹೊಡೆತದಿಂದ ಮಾತ್ರವಲ್ಲ ಅದರ ಚಾಣಾಕ್ಷ ಕಣ್ಣು, ಮೆದುಳು, ಬಾಯಿ ಮತ್ತು ದೇಹದ ಸಮನ್ವಯದಿಂದ ಸಾಧ್ಯವಾಗುತ್ತದೆ.

ಬೇಟೆ ಕೆಳಗೆ ಬಿದ್ದ ನಂತರದ ಎರಡನೇ ಹಂತ

ಆರ್ಚರ್ ಮೀನಿನ ಕೆಲಸ ಕೀಟವನ್ನು ಕೆಳಗೆ ಬೀಳಿಸುವುದರಿಂದ ಮುಗಿಯುವುದಿಲ್ಲ. ಬೇಟೆ ನೀರಿಗೆ ಬಿದ್ದ ತಕ್ಷಣ, ಅದನ್ನು ಮೊದಲು ಹಿಡಿಯುವ ಹೋರಾಟ ಆರಂಭವಾಗುತ್ತದೆ. ಆರ್ಚರ್ ಮೀನುಗಳು ಹಲವಾರು ಬಾರಿ ಬೇಟೆ ಬೀಳುವ ಸ್ಥಳವನ್ನು ಮುಂಚಿತವಾಗಿ ಊಹಿಸಿ ಅಲ್ಲಿಗೆ ವೇಗವಾಗಿ ಚಲಿಸುತ್ತವೆ. ಈ ವೇಗದ ಆರಂಭಿಕ ಚಲನೆಯನ್ನು ಬೇಟೆ ನೀರಿಗೆ ಬೀಳುವ ದಿಕ್ಕು, ವೇಗ ಮತ್ತು ಹೊಡೆಯುವ ಸ್ಥಳವನ್ನು ಅತ್ಯಂತ ಕಡಿಮೆ ಸಮಯದಲ್ಲಿ ಅಂದಾಜಿಸಿ, ಮೀನು ಆ ಕಡೆಗೆ ಚುರುಕಾಗಿ ಚಲಿಸುತ್ತದೆ. ಇದು ಅದರ ಬೇಟೆ ಸಾಧನೆಯ ಎರಡನೇ ಮಹತ್ವದ ಹಂತವಾಗಿದೆ.

ಕಲಿಯುವ ಮತ್ತು ತಿದ್ದಿಕೊಳ್ಳುವ ಸಾಮರ್ಥ್ಯ

ಆರ್ಚರ್ ಮೀನಿನ ಬೇಟೆ ವರ್ತನೆ ಪೂರ್ಣವಾಗಿ ಯಾಂತ್ರಿಕ ಅಥವಾ ಸಹಜ ಪ್ರತಿಕ್ರಿಯೆ ಮಾತ್ರವಲ್ಲ. ಇತ್ತೀಚಿನ ಅಧ್ಯಯನಗಳು, ಇವು ಪರಿಸರದಲ್ಲಿನ ಬದಲಾವಣೆಗಳಿಗೆ ಅನುಗುಣವಾಗಿ ತಮ್ಮ ಗುರಿಸಾಧನೆ ವರ್ತನೆಯನ್ನು ತಿದ್ದಿಕೊಳ್ಳಬಲ್ಲವು ಎಂದು ಸೂಚಿಸಿವೆ. ಉದಾಹರಣೆಗೆ, ಗುರಿಯ ಚಲನೆ ಅಥವಾ ಹೊರಗಿನ ಅಡಚಣೆಗೆ ಅನುಗುಣವಾಗಿ ನೀರಿನ ಹೊಡೆತದ ಸಮಯ ಮತ್ತು ದಿಕ್ಕನ್ನು ಈ ಮೀನು ಜಾಣತನದಿಂದ ನಿರ್ಧರಿಸಬಲ್ಲುದು ಮತ್ತು ಇದರ ಕಲಿಕೆ ನಿರಂತರ ಮತ್ತು ಉತ್ತಮ ಅನುಭವಿ ಮೀನು ಇಟ್ಟ ಗುರಿ ತಪ್ಪುವುದೇ ವಿರಳ.

ಆಹಾರ ಮತ್ತು ಬೇಟೆಯ ವ್ಯಾಪ್ತಿ

ಆರ್ಚರ್ ಮೀನುಗಳ ಪ್ರಸಿದ್ಧ ಬೇಟೆ ಗಾಳಿಯಲ್ಲಿರುವ ಕೀಟಗಳಾಗಿದ್ದರೂ, ಅವುಗಳ ಆಹಾರ ಆಷ್ಟರಲ್ಲೇ ಸೀಮಿತವಲ್ಲ. ಇವುಗಳು ನೀರಿನ ಮೇಲಿನ ಕೀಟಗಳು, ಜೇಡಗಳು ಮತ್ತು ಜಲಚರ ಅಕಶೇರುಕಗಳು ಹಾಗೂ ಕೆಲವೊಮ್ಮೆ ಸಣ್ಣ ಮೀನುಗಳನ್ನೂ ಆಹಾರವಾಗಿ ತಿನ್ನುತ್ತವೆ.

ಫೋಟೋ ಕೃಪೆ : ಅಂತರ್ಜಾಲ

ಆರ್ಚರ್ ಮೀನಿನ ಪರಿಸರ

ಆರ್ಚರ್ ಮೀನು ಕೆಸರಿನ ತೊರೆಗಳು ಮತ್ತು ಉಬ್ಬರವಿಳಿತದ ನದೀಮುಖಜ ಭೂಮಿಯಲ್ಲಿ ಇರುವ ಅಗಲವಾದ ಎಲೆಗಳನ್ನು ಹೊಂದಿರುವ 10–40 ಅಡಿ ಎತ್ತರದ ವಿವಿಧ ಜಾತಿಯ ಮರಗಳ ಪ್ರದೇಶದಲ್ಲಿ ಜಾಸ್ತಿ ವಾಸಿಸುತ್ತವೆ. ಇದನ್ನು ಮ್ಯಾಂಗ್ರೂವ್ ಪರಿಸರ ಎನ್ನುತ್ತಾರೆ. ಈ ಮರಗಿಡಗಳ ಮೇಲೆ ಕುಳಿತಿರುವ ಹುಳಹುಪ್ಪಟೆಗಳು ಮತ್ತು ಕೀಟಗಳು ಈ ಮೀನಿನ ಗುರಿ. ಈ ಪರಿಸರಕ್ಕೆ ಧಕ್ಕೆಯಾದರೆ ಈ ಮೀನುಗಳೂ ಸಹ ಇಲ್ಲವಾಗುತ್ತವೆ.

ಆರ್ಚರ್ ಮೀನು ನಮಗೆ ಕಲಿಸುವ ಪಾಠ

ಆರ್ಚರ್ ಮೀನು ಜೀವ ಜಗತ್ತಿನಲ್ಲಿ ಒಂದು ಮುಖ್ಯ ಸತ್ಯವನ್ನು ನಮಗೆ ನೆನಪಿಸುತ್ತದೆ. ಬದುಕುಳಿಯುವ ತಂತ್ರಗಳು ಪ್ರತಿ ಜೀವಿಗೂ ಸಹ ವಿಭಿನ್ನವಾಗಿರುತ್ತದೆ. ಕೆಲ ಪ್ರಾಣಿಗಳು ವೇಗದಿಂದ ಬೇಟೆಯಾಡುತ್ತವೆ; ಕೆಲವು ಶಕ್ತಿಯಿಂದ; ಕೆಲವು ಮೋಸದ ಮೂಲಕ. ಇವೆಲ್ಲಾ ಕಲೆಗಳನ್ನೂ ಮನುಷ್ಯ ಬಲ್ಲ. ಆದರೆ ಆರ್ಚರ್ ಮೀನು ನೀರನ್ನು ಮಾತ್ರ ಆಯುಧವನ್ನಾಗಿ ಮಾಡಿಕೊಂಡು ಬೇಟೆಯಾಡುತ್ತದೆ. ಈ ಬೇಟೆಯಲ್ಲಿ ದೃಷ್ಟಿಶಾಸ್ತ್ರ, ಭೌತಶಾಸ್ತ್ರ, ದೇಹಸಮನ್ವಯ ಮತ್ತು ಕ್ಷಿಪ್ರ ಲೆಕ್ಕಾಚಾರ ಎಲ್ಲವೂ ಸೇರಿವೆ. ಚಿಕ್ಕ ಮೀನಾದರೂ, ಪ್ರಕೃತಿ ಜೀವಿಗಳನ್ನು ಎಷ್ಟು ಸೂಕ್ಷ್ಮವಾಗಿ ರೂಪಿಸಬಲ್ಲದು ಎಂಬುದಕ್ಕೆ ಇದು ಅತ್ಯುತ್ತಮ ಉದಾಹರಣೆ. ಇದು ಇತರ ಮೀನುಗಳಿಗಿಂತ ಭಿನ್ನ.

ಕೊನೆಯ ಮಾತು

ಆರ್ಚರ್ ಮೀನು ಬಿಲ್ಲು ಹಿಡಿದಿಲ್ಲ, ಬಾಣವೂ ಇಲ್ಲ. ಆದರೆ ಅದು ನೀರನ್ನೇ ಬಾಣವನ್ನಾಗಿ ಮಾಡಿಕೊಂಡಿದೆ. ಅದು ಕೀಟವನ್ನು ನೇರವಾಗಿ ಹಿಂಬಾಲಿಸುವುದಿಲ್ಲ; ಅದನ್ನು ಕೆಳಗೆ ಬೀಳಿಸಿ ಹಿಡಿಯುತ್ತದೆ. ಅದು ನೀರಿನೊಳಗಿದ್ದು ಗಾಳಿಯಲ್ಲಿರುವ ಗುರಿಯನ್ನು ಹೊಡೆಯುತ್ತದೆ. ಅದರ ಸಣ್ಣ ಹೊಡೆತದ ಹಿಂದೆ ದೊಡ್ಡ ವಿಜ್ಞಾನ ಇದೆ. ಆದ್ದರಿಂದ ಆರ್ಚರ್ ಮೀನು ಕೇವಲ ಒಂದು ವಿಚಿತ್ರ ಮೀನು ಅಲ್ಲ. ಅದು ಜೀವಶಾಸ್ತ್ರ ಮತ್ತು ಭೌತಶಾಸ್ತ್ರದ ಸಂಗಮವನ್ನು ಬದುಕಿನ ಮಟ್ಟದಲ್ಲಿ ತೋರಿಸುವ ಜೀವಂತ ಉದಾಹರಣೆ.

• ಡಾ. ಎನ್.ಬಿ.ಶ್ರೀಧರ – ಪ್ರಾಧ್ಯಾಪಕರು ಮತ್ತು ಮುಖ್ಯಸ್ಥರು, ಔಷಧಶಾಸ್ತ್ರ ಮತ್ತು ವಿಷಶಾಸ್ತ್ರ ವಿಭಾಗ, ಪಶುವೈದ್ಯಕೀಯ ಮಹಾವಿದ್ಯಾಲಯ, ಶಿವಮೊಗ್ಗ.