‘ಯಾವ ಪುರಾವೆ ಬೇಕು?’ ಕವನ – ಶೈಲಜಾ ಹಾಸನ

ವಿವರಣೆ ಕೊಡುತ್ತವೆ ಆದರೆ ಕಾಗದ ಅವುಗಳನ್ನು ಒಪ್ಪುವುದಿಲ್ಲ, ಶಬ್ದ ಬಂದಾಗ ನೋವು ಇಲ್ಲ…ಕವಿ ಶೈಲಜಾ ಹಾಸನ ಅವರ ಲೇಖನಿಯಲ್ಲಿ ಮೂಡಿದ ಕವನವನ್ನು ತಪ್ಪದೆ ಮುಂದೆ ಓದಿ…

ಯಾವ ಪುರಾವೆ ಬೇಕು?
ಕೇಳುತ್ತೀಯಾ ಇನ್ನೂ
ಸತ್ಯಕ್ಕೆ ಪ್ರಮಾಣ
ಅಳಿದುಹೋದ ಗುರುತುಗಳಿಗೆ
ಯಾರು ತರುವ ಮೊಹರು
ಒಣಗಿದ ಕಣ್ಣೀರು

ಮರೆಯಾಗುವ ಮೊದಲು
ಅದು ಬರೆದಿತ್ತು
ಎದೆಯ ಮೇಲೊಂದು ಶಾಸನ
ಕಾಲವೆಂಬ ಸಾಕ್ಷಿ
ಪಕ್ಷಪಾತಿ
ಅದು ಉಳಿಸಿಕೊಳ್ಳುತ್ತದೆ
ತನ್ನಿಗೆ ಬೇಕಾದದ್ದನ್ನಷ್ಟೆ
ನೆನಪುಗಳು

ವಿವರಣೆ ಕೊಡುತ್ತವೆ
ಆದರೆ ಕಾಗದ
ಅವುಗಳನ್ನು ಒಪ್ಪುವುದಿಲ್ಲ
ನೋವು ಹೇಳಿಕೊಳ್ಳುವಾಗ
ಶಬ್ದಗಳಿಲ್ಲ
ಶಬ್ದ ಬಂದಾಗ
ನೋವು ಇಲ್ಲ

ಧರ್ಮಶಾಸ್ತ್ರದ ಅಂಗಳಕ್ಕೂ
ತಲುಪದ ಸತ್ಯಗಳು
ಆತ್ಮಸಾಕ್ಷಿಯಲ್ಲೇ
ಕುಸಿದು ಮಲಗಿವೆ
ಹಠಕ್ಕೆ ನಿಲ್ಲಬೇಕೆಂದರೆ
ಬಲ ಉಳಿದಿಲ್ಲ
ನಿಂತಿದ್ದ ಕಂಬ
ಒಳಗೇ ಒಡೆದಿದೆ

ಕಳೆದುಹೋದ ಹೆಜ್ಜೆಯ ಧ್ವನಿ
ಇನ್ನೂ ಕೇಳಿಸುತ್ತದೆ
ಗೆಜ್ಜೆಯಿಲ್ಲದ ಪಾದ
ನೆಲಕ್ಕೆ ತಟ್ಟುವಂತೆ
ಕವಿತೆಯೇ ಕೊನೆಯ ದಾಖಲೆ
ಮೌನವೇ ಸಹಿ
ಇದಕ್ಕೆ ಬೇರೆ
ಯಾವ ಪುರಾವೆ ಬೇಕು?

• ಶೈಲಜಾ ಹಾಸನ