ಲೇಖಕರಾದ ಬಿ.ಜಿ.ಎಲ್. ಸ್ವಾಮಿ ಅವರ ‘ಸಾಕ್ಷಾತ್ಕಾರದ ಹಾದಿಯಲ್ಲಿ’ ಕೃತಿಯ ಕುರಿತು ಲೇಖಕರಾದ ಶ್ರೀಧರ್ ಡಿ ಸಿ ಅವರು ತಮ್ಮ ಅಭಿಪ್ರಾಯವನ್ನು ಹಂಚಿಕೊಂಡಿದ್ದಾರೆ, ತಪ್ಪದೆ ಮುಂದೆ ಓದಿ…
ಪುಸ್ತಕ : ಸಾಕ್ಷಾತ್ಕಾರದ ಹಾದಿಯಲ್ಲಿ
ಲೇಖಕರು : ಬಿ.ಜಿ.ಎಲ್. ಸ್ವಾಮಿ
ಪ್ರಕಾಶನ: ವಸಂತ ಪ್ರಕಾಶನ
ಬೆಲೆ : 120.00
ಕನ್ನಡ ಸಾಹಿತ್ಯದಲ್ಲಿ ವಿಜ್ಞಾನದ ನಿಖರತೆಗೆ ಹಾಸ್ಯದ ಲೇಪನ ಹಚ್ಚಿ, ಜ್ಞಾನವನ್ನು ಅತೀ ಸರಳವಾಗಿ ದಾಟಿಸಿದ ಮಾಂತ್ರಿಕ ಬಿ.ಜಿ.ಎಲ್.ಸ್ವಾಮಿ ಅವರ ‘ಸಾಕ್ಷಾತ್ಕಾರದ ದಾರಿಯಲ್ಲಿ’ ಕೃತಿಯು ಕೇವಲ ಮಾಹಿತಿಯ ಕಣಜವಲ್ಲ. ಅದು ಓದುಗನ ಬೌದ್ಧಿಕ ಕುತೂಹಲವನ್ನು ಕೆರಳಿಸುವ ಒಂದು ರೋಚಕ ಪಯಣ. ಸಾಮಾನ್ಯವಾಗಿ ‘ಸಾಕ್ಷಾತ್ಕಾರ’ವೆಂದರೆ ಯಾವುದೋ ನಿಗೂಢ ಆಧ್ಯಾತ್ಮದ ಅನುಭೂತಿ ಎಂಬ ಭ್ರಮೆ ಇರುತ್ತದೆ. ಆದರೆ ಸ್ವಾಮಿಯವರು ಇಲ್ಲಿ ದೈವಿಕ ಸಾಕ್ಷಾತ್ಕಾರಕ್ಕಿಂತ ಮಿಗಿಲಾಗಿ, ಮನುಷ್ಯನ ದೈನಂದಿನ ಬದುಕಿನ ಅವಿಭಾಜ್ಯ ಅಂಗಗಳಾಗಿರುವ ‘ಚಟ’ಗಳ ಮೂಲವನ್ನು ವೈಜ್ಞಾನಿಕವಾಗಿ ಅನಾವರಣಗೊಳಿಸಿದ್ದಾರೆ.
ಒಬ್ಬ ಶ್ರೇಷ್ಠ ಸಸ್ಯವಿಜ್ಞಾನಿಯಾದ ಸ್ವಾಮಿಯವರು, ಮನುಕುಲದ ಇತಿಹಾಸದ ಗತಿಯನ್ನೇ ಬದಲಿಸಿದ ಸಸ್ಯಸಂಕುಲವನ್ನು ಇಲ್ಲಿ ಪರಿಚಯಿಸುತ್ತಾರೆ. ಎಲೆ-ಅಡಿಕೆಗಳು ನಮ್ಮ ಸಂಸ್ಕೃತಿಯಲ್ಲಿ ಹಾಸುಹೊಕ್ಕಾಗಿರುವ ಪರಿ, ಕಾಫಿ ಮತ್ತು ಚಹಾದ ಘಮಲು ಭಾರತದ ಮಣ್ಣನ್ನು ಪ್ರವೇಶಿಸಿದ ಇತಿಹಾಸ ಹಾಗೂ ತಂಬಾಕು, ಅಫೀಮು ಮತ್ತು ಗಾಂಜಾದಂತಹ ಅಮಲಿನ ಉಗಮವು ಜಗತ್ತಿನಾದ್ಯಂತ ಸಂಚರಿಸಿದ ರೀತಿ ಇಲ್ಲಿ ನಿರೂಪಿತವಾಗಿದೆ. ಇವು ಕೇವಲ ಸಸ್ಯಶಾಸ್ತ್ರದ ಅಂಕಿ-ಅಂಶಗಳಲ್ಲ; ಈ ಗಿಡಮೂಲಿಕೆಗಳು ಭಾರತೀಯ ಬದುಕಿನಲ್ಲಿ ಅನಿವಾರ್ಯವಾಗಿ ಬೆರೆತುಹೋದ ಕಥೆಯನ್ನು ಸ್ವಾಮಿಯವರು ಯಾವುದೋ ಸಾಹಸಮಯ ಕಾದಂಬರಿಯಂತೆ ಕಟ್ಟಿಕೊಟ್ಟಿದ್ದಾರೆ.
ಈ ಪುಸ್ತಕದ ಜೀವನಾಡಿ ಲೇಖಕರ ವಿಶಿಷ್ಟ ಬರವಣಿಗೆಯ ಧಾಟಿಯಲ್ಲಿದೆ. ಕ್ಲಿಷ್ಟಕರವಾದ ವೈಜ್ಞಾನಿಕ ಸಂಗತಿಗಳನ್ನು ಸಾಮಾನ್ಯ ಓದುಗನಿಗೂ ಅರ್ಥವಾಗುವಂತೆ, ವ್ಯಂಗ್ಯ ಮತ್ತು ಚಾಕಚಕ್ಯತೆಯೊಂದಿಗೆ ಸಾದರಪಡಿಸುವುದು ಅವರಿಗೆ ಒಲಿದ ಅಪ್ರತಿಮ ಕಲೆ. ಸಸ್ಯಗಳ ಗುಣಲಕ್ಷಣಗಳಿಗಿಂತಲೂ ಹೆಚ್ಚಾಗಿ, ಆ ಸಸ್ಯಗಳು ಮನುಷ್ಯನ ಮನಃಸ್ಥಿತಿಯ ಮೇಲೆ ಬೀರುವ ಪ್ರಭಾವವನ್ನು ಅವರು ಅತ್ಯಂತ ಮಾರ್ಮಿಕವಾಗಿ ಚಿತ್ರಿಸಿದ್ದಾರೆ. ಇದು ಕೇವಲ ವಿಜ್ಞಾನದ ವಿದ್ಯಾರ್ಥಿಗಳಿಗಷ್ಟೇ ಅಲ್ಲದೆ, ಇತಿಹಾಸ ಮತ್ತು ಮನುಷ್ಯನ ನಡವಳಿಕೆಗಳ ಬಗ್ಗೆ ಕುತೂಹಲವಿರುವ ಪ್ರತಿಯೊಬ್ಬ ಕನ್ನಡಿಗನೂ ಓದಬೇಕಾದ ಜ್ಞಾನಕೋಶವಾಗಿದೆ.
ಯಾವುದೇ ಪೂರ್ವಗ್ರಹವಿಲ್ಲದೆ ಸತ್ಯವನ್ನು ಹುಡುಕುವ ಓದುಗನಿಗೆ ಈ ಕೃತಿ ನಿಜವಾದ ಅರ್ಥದಲ್ಲಿ ಜ್ಞಾನದ ಸಾಕ್ಷಾತ್ಕಾರವನ್ನು ಮಾಡಿಸುತ್ತದೆ. ಬಿ.ಜಿ.ಎಲ್. ಸ್ವಾಮಿಯವರ ವಿಶ್ಲೇಷಣಾತ್ಮಕ ದೃಷ್ಟಿಕೋನವು ನಮ್ಮ ದೈನಂದಿನ ರೂಢಿಗಳ ಹಿಂದಿರುವ ರಹಸ್ಯಗಳನ್ನು ಎದ್ದುಕಾಣುವಂತೆ ಬಿಂಬಿಸುತ್ತದೆ. ಪುಸ್ತಕದ ಕೊನೆಯ ಪುಟವನ್ನು ಮುಚ್ಚಿಟ್ಟಾಗ, ನಮ್ಮ ಮುಂದಿರುವ ಕಾಫಿ ಕಪ್ ನಮಗೆ ಕೇವಲ ವಸ್ತುವಾಗಿ ಕಾಣದೆ, ಶತಮಾನಗಳ ಇತಿಹಾಸವನ್ನು ಹೊತ್ತ ಪಳೆಯುಳಿಕೆಯಾಗಿ ಭಾಸವಾಗುತ್ತದೆ.
- ಶ್ರೀಧರ್ ಡಿ ಸಿ
