ಇಳೆ-ಆಕಾಶದ ಒಲವೀ ಮಳೆಯು,
ಹಳೆ ಅನುರಾಗದ ಹೊಸ ನವಿರಲೆಯು..
ವಿರಹದಿ ಬೆಂದಾ ಬ್ರಹ್ಮನ ಬಾಲೆ,
ಬರೆದಳು ಗಗನಕೆ ಒಲವಿನ ಓಲೆ..
ಹೊತ್ತವು ಮೇಘಗಳಾ ಪ್ರೇಮದ ಹಾಳೆ,
ಕಟ್ಟಲು ಪ್ರಣಯದ ಸವಿ ಸಂಕೋಲೆ..
ಆ ದೇವನು ಇಟ್ಟ ಶುಭ ಘಳಿಗೆಯಲಿ,
ಭೂಮಿಯ ಕೊರಳಿಗೆ ಹನಿಮಣಿಗಳ ತಾಳಿ..
ಗುಡುಗು ಸಿಡಿಲಿನ ವಾದ್ಯವ ಕೇಳಿ,
ಹರಸಿತು ಬೀಸುತಾ ಆ ತಂಗಾಳಿ..
ಮೈಮರೆಯಲು ಮಳೆಯಲಿ ಆಗಸ-ಭುವನ,
ರಸಗತ್ತಲೆ ಸುರಿದರು ಆ ರತಿ-ಮದನ..
ಮುತ್ತಿನ ಮಣಿಗಳ ಮತ್ತೇರಿಸೊ ಚುಂಬನ,
ಕರಿಮೋಡದ ಹೊದಿಕೆಯೇ ಆ ರಸ ಸದನ..
ಪ್ರೇಮದ ವರ್ಷದ ಋತುವಾಗಮನ,
ಭುವನದ ಬಹುದಿನ ವಿರಹದ ಹನನ..
ಒಂದಾಗಿಹವಿಲ್ಲಿ ಇಳೆಯಾಗಸ ಚೇತನ,
ಇದು, ಸೃಷ್ಟಿಯ ಕಾರ್ಯದ ಮೊದಲನೆ ಮಿಲನ..
ಇಳೆ ಆಕಾಶದ ಒಲವೀ ಮಳೆಯು,
ಹಳೆ ಅನುರಾಗದ ಹೊಸ ನವಿರಲೆಯು..
-ಹಶಿ
