‘ಇರಬೇಕು ಇಳೆಯಲ್ಲಿ’ ಕವನ – ಅನಂತ ನಾಯಕ

 ‘ಇರಬೇಕು ಇಳೆಯಲ್ಲಿ, ಸಾಗರಾರ್ಣವದಂತೆ’….ಕವಿ ಅನಂತ ನಾಯಕ ಅವರ ಕವಿತೆಯ ಸುಂದರ ಸಾಲುಗಳು ಓದುಗರ ಮುಂದೆ…ತಪ್ಪದೆ ಓದಿ…

ಇರಬೇಕು ಇಳೆಯಲ್ಲಿ
ಪ್ರಖರ ಭಾನುವಿನಂತೆ,
ತಿಮಿರದಿ‌ ನರಳುವಗೆ
ಸೊಡರು ಬೆಳಗುವಂತೆ|೧|

ಇರಬೇಕು ಇಳೆಯಲ್ಲಿ
ಸ್ವಚ್ಛ ತರುವಿರುವಂತೆ,
ನಿಚ್ಚ ನಿಲುವ ಪಥಿಕರ
ನೆರಳ‌ ಕಾವಣದಂತೆ |೨|

ಇರಬೇಕು ಇಳೆಯಲ್ಲಿ
ಸಾಗರಾರ್ಣವದಂತೆ,
ಬರುವೆಲ್ಲ ನದಿಗಳಿಗೆ
ಮಡಿಲಿನಾಶ್ರಯದಂತೆ |೩|

ಇರಬೇಕು ಇಳೆಯಲ್ಲಿ
ಮಂದ ಮಾರುತದಂತೆ,
ಆರುಮೆಯ ನಮ್ಮಿರುವು
ಚಂದನದ ಸೊವಡಿನಂತೆ |೪|

ಇರಬೇಕು‌ ಇಳೆಯಲ್ಲಿ
ಉಲಿವ ಕೋಕಿಲನಂತೆ,
ಉಕ್ತಿಯಲಿ ಅಕ್ಕರೆಯ
ಅಬ್ಬೆಯಾಸರೆಯಂತೆ |೫|

ಇರಬೇಕು ಇಳೆಯಲ್ಲಿ
ಎತ್ತರದ ಗಿರಿಯಂತೆ,
ಸಾತ್ವಿಕ ಚಿಂತನೆಯ
ಸಂತರ ಬದುಕಿನಂತೆ |೬|

• ಅನಂತ ನಾಯಕ (ಕವಿಗಳು, ಹಿರಿಯ ಲೇಖಕರು, ಕತೆಗಾರರು) ಬೆಂಗಳೂರು