ಮೋಡವು ಮುಸುಕಿದ ಮನಕೆ ಮೌನದ ಆಭರಣ…ಮೂಡದ ನಗುವಿನ ಸೆಲೆಗೆ ಭರವಸೆ ಹೊಂಗಿರಣ…ಚಿನ್ಮಯ (ಚಿನ್ನು) ಅವರಿಂದ ಸುಂದರ ಕವನ, ತಪ್ಪದೆ ಮುಂದೆ ಓದಿ….
ಕನಸಿನ ಸಂತೆಯ ತುಂಬ
ಬಯಕೆಯ ಧವಳಗಿರಿ/
ಮನಸಿನ ಅಂಗಡಿಯಲ್ಲೂ
ನೆನಪಿನ ನವಿಲುಗರಿ//
ಬದುಕಿನ ಪುಟಗಳ ನಡುವೆ
ಓದಿದ ಕಹಿಬರೆಹ/
ಹುಡುಕುವ ಮನಗಳ ಒಳಗೆ
ಮೂಡಲಿ ಸಿಹಿವಿರಹ//
ಸಾಧನೆ ಹಾದಿಯ ಮೇಲೆ
ದ್ವೇಷದ ಕರಿನೆರಳು/
ವೇದನೆ ಬೀದಿಯ ಕೊನೆಗೆ
ಆಸೆಯ ಕಿರುಬೆರಳು//
ಮೋಡವು ಮುಸುಕಿದ ಮನಕೆ
ಮೌನದ ಆಭರಣ/
ಮೂಡದ ನಗುವಿನ ಸೆಲೆಗೆ
ಭರವಸೆ ಹೊಂಗಿರಣ//
ಮಸುಕನು ಹೊಂದುವ ಮುನ್ನ
ಭಾವದ ಬಣ್ಣಗಳು/
ಮುಸುಕನು ಸರಿಸಲೇಬೇಕು
ಜೀವದ ಕಣ್ಣುಗಳು//
- ಚಿನ್ಮಯ (ಚಿನ್ನು) – ಗೋವಾ
