‘ಮಕ್ಕಳ ಮೇಲಿನ ಅತೀ ವ್ಯಾಮೋಹ ಒಮ್ಮೊಮ್ಮೆ ದುಸ್ಥಿತಿಗೆ ಕಾರಣವಾಗಬಹುದು!’… ಹಿರಿಯ ಕನ್ನಡ ಉಪನ್ಯಾಸಕರು ಹಾಗೂ ಸಾಹಿತಿಗಳಾದ ಪ್ರೊ. ಸಿದ್ದು ಸಾವಳಸಂಗ ಅವರ ಲೇಖನಿಯಲ್ಲಿ ಮೂಡಿದ ಕವನ, ತಪ್ಪದೆ ಓದಿ…
ಗಂಡ ಹೆಂಡತಿಯರು ಮಕ್ಕಳೊಂದಿಗೆ
ಸೇರಿ ಸಂಸಾರ ಬಂಡಿ ಎಳೆಯುತ್ತಿದ್ದರು !
ಮಕ್ಕಳೇ ಬಾಳಿನ ಸರ್ವಸ್ವವೆಂದು
ತಿಳಿದು ಬದುಕು ನಡೆಸುತ್ತಿದ್ದರು !!
ಹಗಲಿರುಳೆನ್ನದೆ ದುಡಿದು ಹಣವನ್ನು
ಜೋಪಾನವಾಗಿ ಕೂಡಿಡುತ್ತಿದ್ದರು !
ಉಪವಾಸ ವನವಾಸಬಿದ್ದು
ಹೊಟ್ಟೆಬಟ್ಟೆ ಕಟ್ಟಿ
ಮಕ್ಕಳಿಗೆ ಬದುಕು ರೂಪಿಸಿದರು !!
ಆರತಿಗೊಬ್ಬ ಮಗಳು ಕೀರುತಿಗೊಬ್ಬ ಮಗನು
ಬಾಲ್ಯದಲಿ ಬಲು ಚೆನ್ನಾಗಿದ್ದರು !
ಮಕ್ಕಳ ವಿದ್ಯಾಭ್ಯಾಸದಲ್ಲಿ
ದಂಪತಿಗಳು ತಮ್ಮ ತಾವು ಮರೆತರು !!
ಬೆಳೆದು ದೊಡ್ಡವರಾದ ಮಕ್ಕಳು
ಸರಕಾರಿ ನೌಕಕರಿ ಹಿಡಿದರು !
ಹೆತ್ತವರು ಹಿಗ್ಗಿಹೀರಿಕಾಯಿಯಾದರು
ಕಷ್ಟನಷ್ಟಗಳೆಲ್ಲ ಪರಿಹಾರವಾಗಿ
ದೇವರುಕಣ್ಣು ತೆರೆದನೆಂದು ಖುಷಿಪಟ್ಟರು !!
ಇಬ್ಬರಿಗೂ ಮದುವೆ ಮಾಡಿ
ನೆಮ್ಮದಿಯ ನಿಟ್ಟಿಸಿರು ಬಿಟ್ಟರು !
ಪರಮಾತ್ಮನನ್ನು ದಿನವೂ ಮನದಲ್ಲಿ ನೆನೆದರು
ಮದುವೆಯಾದ ಮಕ್ಕಳು
ಆಗಾಗ ಬರುತ್ತಿದ್ದರು ಮನೆಗೆ
ಹೆತ್ತವರ ಸಂತೋಷ ಇಮ್ಮಡಿಗೊಳಿಸಿದರು !!
ಬರಬರುತ್ತ ಕೆಲಸದೊತ್ತಡದಲ್ಲಿ
ಬರುವುದು ಕಡಿಮೆಯಾಗಿ
ಮುಂದೊಂದು ದಿನ ಪೂರ್ತಿ ನಿಲ್ಲಿಸಿದರು !
ಮಕ್ಕಳ ಬರುವಿಕೆಗಾಗಿ
ಮುದಿ ಜೀವಗಳು ಚಾತಕ ಪಕ್ಷಿಯಂತೆ
ದಿನವೂ ಕಾದರು !!
ಮಕ್ಕಳ ಮೇಲಿನ ವ್ಯಾಮೋಹದಿಂದ
ಅವರು ಹಾಸಿಗೆ ಹಿಡಿದರು !
ಕೆಲವು ದಿನಗಳಲ್ಲಿ ಊಟವನ್ನೇ ಬಿಟ್ಟು
ಹಲಬುತ ರೋಗಗಾಹುತಿಯಾದರು !!
ಮುಂದೊಂದು ದಿನ ಇಬ್ಬರೂ
ಒಂದೇ ದಿನ ಪ್ರಾಣ ಬಿಟ್ಟರು !
ಊರ ಜನ ಇವರ ಕರುಣಾಜನಕ
ಸ್ಥಿತಿ ನೋಡಿ ಮರುಗಿದರು !!
ಮಕ್ಕಳಿಗೆ ಫೋನಾಯಿಸಿ ಹೆತ್ತವರ
ಮಣ್ಣಿಗೆಬರಲು ತಿಳಿಸಿದರು !
ನಮಗೆ ಬರಲು ಸಮಯವಿಲ್ಲ
ಎಲ್ಲ ಕಾರ್ಯವನ್ನು ನೀವೇ ಮುಗಿಸಿ
ನಿಮಗೆ ಖರ್ಚಿನ ಹಣ ಕಳಿಸುವೆನೆಂದರು !!
ಇಂತಹ ಮಕ್ಕಳು ಇದ್ದರೆಷ್ಟು ಬಿಟ್ಟರೆಷ್ಟು ?
ಪಾಪಿ ಮಕ್ಕಳಿವರು ಊರವರೇ ಕೂಡಿ
ಅಂತ್ಯ ಸಂಸ್ಕಾರ ಮಾಡಿ ಮುಗಿಸಿ
ಮನದಲ್ಲಿ ಬಲು ನೊಂದರು !!
ಮಕ್ಕಳ ಮೇಲಿನ ಅತೀ ವ್ಯಾಮೋಹ
ಒಮ್ಮೊಮ್ಮೆ ದುಸ್ಥಿತಿಗೆ ಕಾರಣವಾಗಬಹುದು !
ಆದರೂ ಅವರನ್ನು ಹೆತ್ತ ತಪ್ಪಿಗೆ
ಇದೆಲ್ಲವನ್ನು ಅನುಭವಿಸಲೇಬೇಕು !!
- ಪ್ರೊ. ಸಿದ್ದು ಸಾವಳಸಂಗ, ತಾಜಪುರ – ಹಿರಿಯ ಕನ್ನಡ ಉಪನ್ಯಾಸಕರು ಹಾಗೂ ಸಾಹಿತಿಗಳು, ವಿಜಯಪುರ.
